BAGUIO CITY – Pimmusayen ni Baguio City Councilor Roberto “Bungo” Campos Ortega itay 1:30 ti malem.
Sigun iti kabsatna a ni Mario Ortega, naideklara a pimmusay ti konsehal bayat a matamtaming iti Lorma Medical Center sadiay San Fernando City, La Union.
Kinunana a pimmusay ni Coun. Ortega gapu iti sagsagabaen daytoy a kanser iti uneg ti tallo a tawen.
Sigun met kenni City Vice Mayor Edison Bilog, maki-koordinarda pay iti pamilya ti konsehal ken manamnama a maiturong iti city council ti bangkay daytoy ita a lawas.
Maipalagip a ni Coun. Ortega ti ama ni actor Robert Ortega ken actress Michelle Ortega ken nagtaud iti nalatak a political clan sadiay La Union.
Nagserbi daytoy kas chairman ti Committee on Public Protection and Safety, Peace and Order ti City Council ti siudad ti Baguio.
Nagserbi pay ti retired colonel a dadaulo ti Baguio City Police Office idi 1985 agingga 1987 a nangitunda iti panagbaba ti crime rate ti City of Pines iti 95%.
Gapu iti panangdalusna iti siudad ti Baguio bayat ti panagserbina kas pulis idi dekada otsenta ket nagbalin daytoy nga inspirasyon ti maysa a pelikula.
