BAGUIO CITY – Natnag ti maysa a balay sadiay Sitio Bagtangan, Gambang, Bakun, Benguet bayat nga agngangabit a matnag metlaeng ti kaabayna a balay gapu iti panakargaay ti baba dagitoy.
Sigun kenni Bakun Mayor Fausto Labinio, tagikua ti maysa a pamilya dagiti nasao a balay.
Kinunana a dua a kadsaaran a kongkreto ken kabarbaro ti natnag a balay nupay nabaelan ti agtagikua a mangiruar iti sumagmamano a kagawaan dagitoy.
Innayonna a nagbakwit metten iti kabagianda ti nasao a pamilya.
Kabayatanna, naipangato ti Alert Level 2 sadiay Sitio Buagi, Barangay Poblacion, partikular iti landslide hazard prone area sadiay.
Sigun iti Bakun PNP, siyam a pamilya ti naibakwit idi laeng rabii.
Immunan a naalaan ti video ti nalawa a panaglenned ti daga sadiay idi napalabas a tawen.
Naamuan pay a temporaryo a naisardeng ti clearing operation iti nargaan a paset ti Liwang-Ampusungan Road gaputa nadadael ti kakaisuna a backhoe ti munisipyo a maar-aramat sadiay.
Innayon ti mayor nga uray madaldalusan ti daga iti baba ket manaynayonan metlaeng manipud iti marmargaay a ngato ti bantay.
