BAGUIO CITY-Inaklon ti rebelde a New Peoples Army a dagitoy ti nangraut iti detachment ti Civilian Armed Forces Geographical Unit wenno CAFGU sadiay Bucloc, Abra idi kanikadua ti malem.
Sigun kenni Diego Wadagan, panakangiwat ti Abra-based Agustin Begnalen Command ti NPA, impatungpalda ti nasao nga insidente kas panagtulnog iti pammilin ti NPA national command a mangiyusuatda iti ad-adu a tactical offensives kontra iti gobyerno.
Dinakamatna nga inasitgan dagiti rebelde ti detachment ti CAFGU sadiay Barangay Labaan ken pinalpaltoganda dagiti agnanaed sadiay.
Kinunana a daytoy ket pannusa iti 24th Infantry Battalion Philippine Army ken ti militia gapu iti maatap a “blood debts” dagitoy kadakuada ken kadagiti Abrenians.
Dinakamatna a karaman kadagiti “blood debts” dagiti soldado ken militiamen a rinautda ket ti maatap a panangbombada kadagiti komunidad sadiay idi napalabas a tawen a nakaapektaran ti biag ken pagbiagan dagiti umili sadiay.
Innayunna a ti detachment ket adda iti uneg ti maysa a barangay, a maysa a panaglabsing iti International Humanitarian Law.
