BAGUIO CITY – Umap-apela ti maysa a taxi driver kadagiti pasahero a raemenda met kuma dagitoy.
Kasaruno pay laeng daytoy ti panangbastos ti maysa a pasahero kenkuana iti baet a lakayen daytoy.
Segun kenni Lorenzo Magtubo, 58, residente ti Piripin Bato, Pico, La Trinidad, Benguet, sinardenganna ti pasaherona a balasang iti deppaar ti Kalapati St. ken idi inlukat daytoy ti ridaw ti taxi ket naitama ti ridaw iti kabete a nangitunda tapnu makupit daytoy.
Nupay kasta, saan daytoy a sinitar ti driver ken binagaanna nga ikabilna ti bagahe daytoy iti likod ti taxi.
Segun kenni Magtubo, idi sinaludsodna nu sadino ti pagpatulodan ti pasahero ket pabugkaw ti inkasta daytoy a nagsao ken nagpatulod iti terminal ti bus.
Bayat ti panagbiahe dagitoy ket napaliiw ti taxi driver nga agkaratext ti pasaherona ken idi nakadanonda sadiay PNR ket nagkiddaw iti pammakawan ti pasahero gapu iti klase ti panagsasaona.
Nupay kasta, naklaat ti taxi driver gaputa nakaawat daytoy iti mensahe manipud iti operator-na seknan iti reklamo ti panangbastosna kanu iti nasao a pasahero.
Dita a napasaktan ti driver gaputa awan ti inar-aramidna iti nasao a pasahero uray nu nakupit ti ridaw ti taxi-na ken uray nu pabugkaw ti panakisarita daytoy kenkuana.
Gapu iti daytoy ket immapela ti driver kadagiti pasahero nga ipaayanda iti respeto dagiti taxi drivers gaputa uray nu adda dagiti birkog a taxi drivers ket ad-adu latta dagitoy a pagwadan.
Namnamaenna met a makasarakna manen ti nasao a pasahero tapnu agtongtong dagitoy a nalapat gaputa iti las-ud ti tallopulo a tawen a panagpaspasadana ditoy siudad ket awan pulos ti binasbastosna a pasahero daytoy.
