BAGUIO CITY – Kinasuan ti maysa a kontraktor sadiay Kalinga ti uppat a drivers daytoy kalpasan a natiliwan ti panangilibas ken panangilakoda iti adu a galon ti gasolina manipud iti truck ti kompanya a maar-aramat iti agtultuloy a konstruksion ti national road sadiay munisipyo ti Tanudan iti nasao a probinsia.
Iti salaysay ti testigo, nailugan iti maysa a pick-up ti sangapulo ket siyam a galon ti gasolina a naabbongan ti tolda manipud sadiay Sitio Gimma, Barangay Babbanoy, Tanudan ken naiturong iti Tabuk City.
Nupay kasta, babaen iti checkpoint ti pulisya ket nakemmeg ken nakumpiskar dagiti natakaw ginalgalon a gasolina.
Iti met panakiuman ti Bombo Radyo kenni PSSupt. Alfredo Dangani, provincial director ti Kalinga PNP, kinunana a naipila ti kaso a qualified theft kontra kada Roberto Ayap, 41-anyos; Johnson Nawi, 34-anyos; Joel Felix, 34-anyos a bin-ig a residente ti Tabuk City ken ni Roberto Asboc, 63-anyos a residente ti Pasil, Kalinga.
Kinunana a naipilaan met ti kaso a panaglabsing iti Anti-Fencing Law ti nanggatang iti nasao a gasolina a ni Jornal Mang-eg, 32-anyos a residente ti Tabuk City.
Mapapati a nasusup dagiti nasao a gasolina manipud iti tangke ti dump truck ti nasao a kontraktor nga addaan ti pakabuklan a gatad a P17,360.
Kinuna met dagiti umili sadiay a saan laeng a daytoy ti umuna a gundaway nga adda ti nangtakaw iti gasolina a maaramat kuma iti manarimaan a patrabaho sadiay.
