BAGUIO CITY – Kinondenar ti 81st Infantry Battalion, Philippine Army ti panangraut dagiti New Peoples Army iti maysa a pagadalan sadiay Quirino, Ilocos Sur a nangitunda iti ipupusay ti maysa a soldado ken ti panakadangran ti maysa pay a soldado.
Iti panakipatang ti Bombo Radyo kenni Lt. Col. Eugene Julio Osias IV, commander ti 81st Infantry Battalion, kinunana nga arigna nga awan ti bibiang dagiti NPA iti kinatalged dagiti sibilyan.
Kinunana a nagturong sadiay Patiacan Elementary School dagiti soldado tapnu tulunganda dagiti estudyante ken mannursuro sadiay a mangpapintas iti aglawlaw ti nasao a pagadalan.
Kalpasan iti daytoy ket napagnumuan dagiti soldado ken dagiti residente nga agbasketball sakbay a napasamak ti pammaltog.
Naamuan nga idi napalabas a lawas ket nagpabettak metlaeng iti Improvised Explosive Device dagiti NPA sadiay Barangay Patungkalew iti kapada metlang a munisipyo a nangitunda iti panakadadael ti atep ti barangay hall, maysa a motorsiklo ken ti tawa ti maysa a balay.
Kabayatanna, nangipatungpal iti “daw-es” dagiti elders sadiay kalpasan ti nasao a panagraut.
Iti panakiuman ti Bombo Radyo iti maysa a residente sadiay a nakaimatang iti insidente, kinunana a nagparti iti ayop dagiti elders iti nasao a lugar kas paset pay laeng ti “daw-es” tapnu malapdan wenno saanen a maulit ti napasamak nga insidente.
Kinunana a dumanon iti tallopulo nga estudyante ken agarup duapulo a dadduma pay a sibilyan ti naipasidong iti nasao a ritwal kalpasan a naimatanganda ti nasao a pammaltog idi kalman.
Innayunna a panggepda met laeng nga ipasidong iti debriefing dagiti estudyante kalpasan ti panaka-trauma dagitoy.
Imbinglayna met a kabayatan ti pammaltog ket laplapdan dagiti ubbing ti sangitda iti baet ti boteng dagitoy a mairamanda iti insidente bayat a ti dadduma ket nagpukpukkaw a sibilyanda tapnu saan dagitoy nga iraman dagiti kabusor.
