BAGUIO CITY – Dinayaw ti 81st Infantry Battalion, Philippine Army ti kinabanwar ti soldado dagitoy a pimmusay ken nadangran iti panangraut dagiti maatap a kameng ti New People’s Army iti maysa a pagadalan sadiay Quirino, Ilocos Sur.
Immunan a nabigbig ti pimmusay a ni Private First Class Peter John Villanueva, 27-anyos ken tubo ti Santiago, Botolan, Zambales bayat a ti nadangran ket ni Private First Class Ismael Michael Mama, 26-anyos ken tubo ti Macabebe, Pampanga.
Iti ekslusibo a panakipatang ti Bombo Radyo kenni Lt. Col. Eugene Julio Osias IV, commander ti 81st Infantry Battalion, kinunana nga insakripisyo ni Villanueva ti bukodna a biag iti panangprotektarna iti maysa nga ubing.
Kinunana a tinaray ni Villanueva ti maysa nga ubing a tumartaray ken inarakopna tapnu saan daytoy a matamaan iti bala ti paltog a nangitunda tapnu matamaan ti tenggedna a nangitunda iti ipupusayna.
Kabayatanna, dinayawna metlaeng ni Mama kalpasan ti napartak a panagaksyonna tapnu mailemmeng dagiti mannursuro ken estudyante.
Nangitunda met daytoy iti panakadangranna kalpasan a natamaan iti bala ti paltog ti abaga daytoy.
