BAGUIO CITY – Imparangen ti PNP-Criminal Investigation and Detection Group (CIDG) iti publiko ti ‘hired killer’ a nangbagbagsol kenni Paracelis Mountain Province Mayor Avelino Amangyen idi October 10 ti agdama a tawen.
Sigun kenni PNP-CIDG chief Director Roel Obusan, ti nasao a suspek ket ni George Ginabay a maysa a maatap a motorcycle-riding criminal a nagpammarang kas “Sergeant George Guinolbay” ti Philippine Army babaen iti panangiparang daytoy iti peke nga identification cards.
Kinunana nga inaramat ti suspek ti Guinolbay gaputa adda ti maysa a Major Guinolbay a kameng ti Philippine Army ken daytoy ti inar-aramat ti suspek kadagiti kontrata.
Innayonna a nagpampammarang ti suspek kas maysa a graduate ti scout ranger tapnu ngumato ti presyo daytoy ken kanayon a biktimana dagiti addaan nangangato a posisyon a kas kenni Mayor Amangyen.
Kinemmeg dagiti operatiba ti CIDG ti nasao a suspek sadiay Nueva Vizcaya babaen iti bileg ti warrant of arrest.
Maipalagip a binagbagsol ni Ginabay ti nasao a mayor iti sangwanan ti maysa nga bangko sadiay Santiago City, Isabela bayat nga aginana ti biktima iti luganna ken nabaelan ti mayor a nangitaray iti bukodna a bagi iti pagagasan babaen iti panagluganna iti tricycle.
Nagsagrap ti mayor iti bagsol iti nagduduma a paset ti bagi daytoy, partikular iti barukong ken siket.
Naamuan a ti suspek ti nangpapatay met iti dua a punong barangay ken maysa a pulis.
http://www.bomboradyo.com/panakabagsol-ti-mayor-ti-paracelis-mt-province-maimimbestigaran/
