BAGUIO CITY – Nakemmeg ti 16 nga indibidual, pakairamanan ti tallo a gangannaet kalpasan a nakumpiskar iti van a nagluganan dagitoy ti adu a marijuana nga aggatad ti nasurok P1.4-M sadiay Sabangan, Mt. Province idi December 5.
Nabigbig ti driver ken agtagikua iti lugan a ni Bayani Salandanan Malang, 54-anyos ken residente ti Tondo, Manila; bayat a 12 kadagiti pasahero ti natataengan bayat pakairamanan dagiti gangannaet bayat a 4 dagiti menor de edad.
Naamuan a 10 kadagiti pasahero ti taga-Tondo, Manila; maysa ti taga-Montalban, Rizal ken maysa ti taga-Caloocan, City bayat a kadagiti tallo a gangannaet ket maysa ti Fil-Am a residente ti Quezon City ken ti kaduana a Fil-Am ken Nigerian ket agnanaedda sadiay San Fernando, La Union.
Maibasar iti report, idi December 4 ket nakaawat ti report ti Sabangan PNP mainaig iti puraw a van a nagtaud sadiay Buscalan, Tinglayan, Kalinga a paturong iti siudad ti Baguio a mamapati a naglaon iti marijuana.
Dagus a nangisayangkatda iti checkpoint iti national road sadiay Todey, Poblacion, Sabangan, Mt. Province ken idi impalukatda ti tawa ti van ket naangotda ti marijuana a nangitunda iti panangipalukatda iti bag ti maysa kadagiti pasahero ken sadiay a nadiskubre ti marijuana nga agdagsen iti agarup nasurok 58 grams.
Kinuna dagiti pulis a mangipatungpalda iti kanayonan a panagsukimat iti lugan ngem nagkedked dagiti pasahero isut gapuna nga inturongda dagiti pasahero ken ti lugan iti Sabangan PNP ken kiniddawda ti tulong ti PDEA Cordillera.
Iti panakaituloy ti panangsukimat dagiti pulis iti nasao a van iti presensia dagiti testigo ken ti PDEA-Cordillera idi December 5, nakumpiskar ti 56 a pidaso ti 5,600 grams a marijuana bricks, 4 a reppet ti 700 grams a marijuana stalks ken maysa a sachet ti 30 grams a naburbur a marijuana.
Naipaima dagiti suspek iti korte bayat a naiturong iti kustodiya ti DSWD dagiti menor de edad nga estudyante ken naiturong met iti PNP – Regional Crime Lab dagiti nakumpiskar nga iligal a droga.
Sumango dagiti suspek iti kaso a panaglabsing iti RA 9165 wenno iti Comprehensive Dangerous Drugs Act of 2002.
