BAGUIO CITY – Maan-anop ita ti suspek a nangtakaw iti agarop kagudua a milyon a pisos a gatad dagiti nagduduma a gameng ken kuarta iti maysa a pwesto sadiay Dangwa Terminal, Baguio City.
Nabigbig daytoy a ni Davidson Miranda, adda iti legal nga edad, salesboy, tubo ti Pampanga ken residente ti T. Alonzo Street, Baguio City.
Nabigbig met ti biktima a ni Cherrylyn Berongoy, 30-anyos ken agtagikua iti nasao a pwesto.
Naamuan nga agpapaay ti suspek kas salesboy iti nasao a pwesto ken naipaayan daytoy iti duplicate key,
Maibasar iti report, naklaat laengen ti biktima ken ti common-law husband daytoy gaputa idi ilukatda kuma ti pwesto ket sadiay a nakitada a pwersado naluktan ti uneg a kuarto ti pwesto.
Naduktalanda a mapukpukaw ti 21 boxes ti lakoda nga oitment wenno herbal oil nga aggatad iti nasurok P164K, portable vault a naglaon iti 10 kilos a silver nga aggatad iti nasurok P300K, laptop nga aggatad iti P10K ken cash a dumanon iti P10K.
Nakita iti video footage a nairekord ti CCTV camera iti pasdek ti panangtakaw ti suspek kadagiti nasao a gamaneg.
Naamuan a nangtangdan pay ti suspek iti maysa nga indibidual a nangbagkat kadagiti banag a tinakawna.
Adda pay ti nakakita iti panagturong ti suspek iti paradaan ti maysa a bus.
Sumangsango ti suspek iti kaso a qualified theft ken robbery with force upon things.
