BAGUIO CITY – Nailista ti siudad ti Baguio ti kaunaan a kaso daytoy iti firecracker-related injury ita a holiday season.
Iti panakiyuman ti Bombo Radyo kenni Dr. Donabel Tubera, dadaulo ti Epidemiology and Surveillance Unit ti City Health Services Office, kinunana a ti nasao a biktima ket 18-anyos a lalaki a residente ti Pinsao Proper.
Dinakamatna a nadangran ti kikit ti kanawan nga ima ti biktima kalpasan a naputokan daytoy iti piccolo iti pasado alas onse ti rabii idi kanikadua.
Nupay kasta, naduktalanda a saan a ti nasao a biktima ti nagpaputok iti piccolo no diket posible a natamaan laeng daytoy.
Patienda a nagatang ti nasao a piccolo iti ruar ti siudad nangruna ta maipawil ti panagilako ti paputok ditoy.
Nupay awan ti klasipikasyon ti piccolo no maipawil daytoy wenno saan, impetteng ni Tubera nga amin a paputok, legal man wenno saan ket makadangran latta kadagiti tattao.
Kagiddan iti daytoy, imbalakadna manen a no adda ti dunor manipud iti paputok ket dagus nga ugasan iti agay-ayos a danum iti tallo agingga lima a minutos sakbay nga iturong iti pagagasan para iti panakaipaay ti anti-tetanus nga agas.
