BAGUIO CITY- Agtultuloy ti imbestigasyon iti panakatnag ti Toyota Hilux iti rangkis iti Baguio-Benguet Nueva Vizcaya Road partikular iti boundary ti Adonot, Ambuklao, Bokod Benguet ken Guisit, Tinongdan, Itogon, Benguet idi kalman.
Segun kenni PSIns. Vicente Tamid-ay, hepe ti Bokod PNP, iti agdama ket maim-imbestigaran pay laeng ti nasao nga insidente nangruna ta saanda pay laeng a makasarita ti driber ti lugan gapu iti kritikal a kasasaad daytoy.
Binigbigna dagiti pimmusay a da Judea Layno, 13-anyos; Juleah Layno, 9-anyos ken ni Fel Layno, 60-anyos.
Kabayatanna, nabigbig met dagiti naiturong iti pagagasan a da Joefel Benito Layno, 43-anyos, driber ti lugan ken kameng ti Bambang PNP; Juith Layno, 30-anyos kenni Joreich Layno, 2-anyos ken agpapada dagitoy a residente ti Bambang, Nueva Vizcaya.
Kinunana a naggapo iti siudad ti Baguio dagiti nasao nga indibidwal ken paawiden dagitoy sadiay Nueva Vizcaya idi napasamak ti aksidente.
Kinunana a posible a mechanical defect ti rason ti panakatnag ti lugan iti rangkis nga addaan iti kauneg nga agarup 50 a metro.
