BAGUIO CITY – Manamnama a gumatang ti General Services Office ti siudad ti Baguio iti uppat a baro a garbage trucks ita a tawen.
Sigun kenni Eugene Buyucan, dadaulo ti nasao nga opisina, daytoy ket tapnu manayonan ti agdama a 14 a garbage trucks ti lokal a gobyerno nga agrikrikos ken agkolkolektar iti basura kadagiti 128 a barangay ditoy siudad.
Kinunana nga agarup 25 a garbage trucks ti kasapulan ti siudad tapnu napartak ti panakakolektar dagiti basura kadagiti babbarangay.
Dinakamatna a P20 million ti inlatangda a pondo para iti panakagatang dagiti nasao a trak bayat a gumatangda metlaeng iti bassit a garbage truck a mabalin a makastrek kadagiti naiilet a kalsada ditoy siudad.
Nangilatangda met iti P13 million para iti panggep a bodegada sadiay New Lucban.
