BAGUIO CITY – Agtultuloy ti panangtulong ti maysa a pribado nga organisasion kadagiti pamilia dagiti Igorot a pulis ken soldado a pimmusay iti ranget sadiay Marawi City idi napalabas a tawen.
Sigun kenni Elisa Reyes manipud iti Cordillera Binnadang Foundation, nakaur-orda iti nasurok P300,000 para kadagiti pamilia dagiti pimmusay a banuar iti agtultuloy a fund raising dagitoy.
Kinunana a nagtaud ti nasao a gatad kadagiti cash donations, garage sales ken football tournament nga impatungpal ti organisasion idi napalabas a tawen.
Innayonna nga inton Enero 27 ket mangipatungpalda iti dance fitness for a cause iti gym ti Baguio City National High School iti oras ti alas kuatro ti malem aginggat alas sais ti sardam.
Al-allukuyenna met dagiti interasado a tumulong a sarungkaranda laeng ti facebook page ti organisasion para iti kanayunan a detalye.
Impanamnama ti organisasion nga amin a maur-or dagitoy a kuarta ket maipaay kadagiti pamilia dagiti pimmusay a Cordilleran Heroes.
