BAGUIO CITY – Dakkel ti panagyaman ti maysa a pamilya a nauraman ti balay sadiay Cresencia Village ditoy siudad ti Baguio idi parbangon gaputa saan a nairaman a nauram ti malamlamayan a bangkay ti amada.
Iti panakiyuman ti Bombo Radyo kenni Michael Carreon, kinunana a natuturog daytoy idi riniing dagiti kakabagianda a mangbambantay iti amada.
Dinakamatna a manarimaan ti panagbantay dagiti kakabagianda idi nakasay-op dagitoy iti angot ti plastik a maur-uram ken idi kinitada ti pagtataudan daytoy ket nakitada ti uram.
Dagusda a riniing dagiti natuturog a kameng ti pamilya ken pimmanawda iti nasao a balay.
Inaklonna met a saanda a napanunot nga iruar ti lungon ti amada gaputa impangrunada pay dagiti ubbing ken ginandatda pay a nagbuyat ti danum ngem napigsa unay ti uram.
Umap-apela met daytoy iti tulong manipud iti lokal a gobyerno ti siudad ti Baguio nangruna ta awan pulos ti naispalda nga arwaten wenno aniaman a gameng dagitoy.
