BAGUIO CITY – Rinugianen ti La Trinidad Municipal Police Station ken ti DPWH – Benguet 1st Engineering District ti panangdalusda kadagiti kalsada iti masakupan ti munisipyo.
Sigun kenni PCI Benson Macli-ing, hepe ti La Trinidad PNP, nailanad iti resolusyon a pinutar ti Sangguniang Bayan nga agbinnadang ti pulisya ken ti DPWH iti panaka-ikkat dagiti lugan a nabayagen a nakaparada iti igid dagiti kalsada.
Kinunana nga immunan a sinuratanda dagiti babbarangay ken dagiti agtagikua kadagiti lugan tapnu ikkatenda ti nakaparada a luganda iti igid ti kalsada.
Dinakamatna a sumagmamano kadagiti daan a lugan a nakaparada iti igid dagiti kalsada sadiay La Trinidad ket naikkat kas iti maysa a puraw a taxi a nakaparada iti igid ti kalsada sadiay Kilometer 4 a ginuyod ti equipment ti DPWH kalpasan a dimmanon iti maysa a tawen a naiparada sadiay a maikonkonsidera nga obstruction iti kalsada ken adda pay ti maysa a van sadiay Puguis nga inikkat dagitoy.
Innayon ni Macli-ing nga agtultuloy ti clearing operation wenno panang-ikkatda kadagiti lugan wenno aniaman a sali kadagiti kalsada sadiay.
Binagaanna met dagiti motorista tapnu saanda nga ibati ti daan a luganda iti igid ti kalsada tapnu saan dagitoy nga agbalin a sali iti pagnaan ti publiko ken mangitunda iti nailet a gunay ti trapiko ken disgrasya.
