BAGUIO CITY – Matamtaming paylaeng iti pagagasan ti maysa a car painter kalpasan a dinangran daytoy ti padana a karpentero sadiay Cresencia Village, siudad ti Baguio idi rabii.
Nabigbig ti biktima a ni Joel Boado Delos Santos, 52-anyos, naasawaan ken residente ti Paraan St., Victoria Village bayat a nabigbig ti nakemmeg a suspek a ni Teodoro Gamboa, 43-anyos, naasawaan ken residente ti Cresencia Village.
Maibasar iti report, naginom iti arak dagiti dua iti balay ti suspek.
Nupay kasta, naaddaan dagitoy iti saan a panagkinnaawatan agingga a nagsinnungbatda.
Inala ti suspek ti maysa a gitara ken impang-uran daytoy iti ulo ti biktima sakbay a nagala iti buneng ken intagbatna iti kanawan a takiag ti biktima.
Gapu iti daytoy, naglak-am ti biktima iti sugat iti ima ken gasga iti rupa bayat a nakemmeg ti suspek nga ita ket sumangsango iti kaso a physical injuries.
