BAGUIO CITY – Pimmusay ti maysa a mapapati nga agtatakaw kalpasan a napaltogan ken natnag daytoy iti daga manipud iti kalkalay-atenna a pader ti maysa a hotel sadiay Salud Mitra, Baguio City idi rabii.
Sigun iti pulisya, agliblibas ti biktima ken ti kaduana babaen iti panagkalay-atda iti kongkreto a pader ti nasao a hotel kalpasan a mapapati a napaay dagitoy nga agtakaw iti maikadua a kadsaaran ti pasdek.
Naamuan a maysa kadagiti desk officers ti hotel ti timmawag iti guwardiya ken nangitudo iti lokasyon dagiti suspek.
Dagus a nagaksion ti nasao a guwardiya ken sadiay a pinaltoganna dagiti agliblibas a lallaki.
Natnag iti daga ti biktima manipud iti pader nga addaan kangato nga 11 a kadapan.
Nagsagrap daytoy iti maysa a tama ti bala ti paltog iti kanawan nga abaga bayat a maysa met iti kanawan a saka.
Agtultuloy met ti imbestigasyon ti pulisya tapnu maamuan ti pudpudno a napasamak.
