BAGUIO CITY – Nakemmeg ti uppat a baro kalpasan a naaktuwan ti panagsigarilyo dagitoy iti marijuana iti uneg ti maysa a lugan sadiay Upper General Luna Road, siudad ti Baguio idi kalman.
Nabigbig dagitoy a da Christian Geosep Valdez, 20-anyos; Isaiah Jarett Abile, 22-anyos; Mark Kevin Culala, 22-anyos ken ni Johnric Buenaventura, 19-anyos a bin-ig a residente iti siudad ti Baguio.
Maibasar iti report, nangipatungpal ti Criminal Investigation and Detection Group, Drug Enforcement Unit ti Baguio City PNP ken ti PDEA-Cordillera iti operasyon kontra kadagiti nasao nga indbidual.
Ditoy a naaktuwan ti panagsigarilyo dagiti uppat iti marijuana iti uneg ti maysa a lugan a nakaparada iti sangwanan ti maysa a simbaan.
Nakumpiskar manipud kadagiti uppat ti maysa a glass tube a naglaon ti marijuana residue, dua a plastik na naglaon ti dried marijuana, plastic toother, tallo a plastic a naglaon ti marijuana, lighter, libro ken plaka ti lugan.
Sumangsango ita dagiti uppat iti kaso a panaglabsing iti RA 9165 wenno iti Comprehensive Dangerous Drugs Act of 2002.
