BAGUIO CITY – Imbilin ti Department of Environment and Natural Resources (DENR) ti panagbayad ti Lepanto Consolidated Mining Company (LCMC) iti P50,000 kas multa daytoy gapu iti panaglabsingda iti kondisyon a nailanad iti naipaay nga Environmental Compliance Certificate iti sibubukel nga operasion ti kompanya.
Immuna iti daytoy, nangisayangkat ti CENRO-Buguias iti assessment iti mairekreklamo nga aktibidad ti kompanya sadiay Paco Mankayan, Benguet idi pay napalabas a tawen.
Naduktalan a sangapulo a puon ti Benguet pine trees ti iligal a pinukan ti kompanya kabayatan ti panangipasdek dagitoy iti access road para iti pipe line system ti tailings dam dagitoy.
Naamuan a ti tailings pipe system ket paset ti Annual 2017 Environmental Protection and Enhancement Program ti kompanya nga inaprobaran ti Mine Rehabilitation Fund Committee para iti LCMC.
Gapu iti panaglabsing ti nasao a kompanya, nairekomendar ti panakaipaulog ti cease and desist order manipud iti DENR-Cordillera.
Nailanad iti pammilin ti ahensia a linabsing ti kompanya ti forestry ken environmental laws ti pagillian.
