BAGUIO CITY — Napilin dagiti walo nga elementary schools a nakastrek iti Drum and Lyre – Street Dance Competition a maysa iti highlight ti Panagbenga inton Pebrero 24.
Immuna iti daytoy, sangapulo ket maysa nga entries ti nakipaset para iti elimination round ti nasao a pasalip.
Manipud kadagiti entries, nagun-od ti Apolinario Mabini Elementary School ti kangatuan nga iskor a 91.93 percent ken addaan dagitoy iti tema a “Pigsa ken Gagem: A Tribute to Our Culture”.
Simmaruno a nakastrek ti Baguio Central Elementary School nga addaan ti iskor nga 85.07 percent, maikatlo ti Tuba Central Elementary School nga addaan ti iskor nga 83.40 percent.
Maikapat ti Josefa Cariño Elementary School, maikalima ti Aguinaldo Elementary School, maikanem ti Dominican-Mirador Elementary School, maikapito ti Manuel L. Quezon Elementary School ken maikawalo ti Jose P. Laurel Elementary School.
Kabayatanna, iti met closing remarks, nagyaman ni Councilor Elmer Datuin kadagiti nagbuya iti Grand Opening Parade kagiddan ti panangguyugoyna iti panagbuya manen dagitoy iti Grand Float Parade ken Grand Street Dance Parade inton Pebrero 24 ken 25.
