--Ads--
BAGUIO CITY – Inwaragawag ni Presidential spokesperson Harry Roque nga isimsimpanan ti panagtaripnong da Presidente Rodrigo Duterte ken Benguet Governor Cresencio Pacalso.
Nupay kasta, saanna a dinakamat ti partikular nga aldaw para iti panagsinnarak dagiti dua.
Kinunana a manamnama a pagsaritaan dagitoy ti arungaing dagiti opisial iti rehion para iti matartarigagayan nga otonomiya iti Cordillera ken dadduma pay a pakaseknan iti probinsia ti Benguet kas iti industriya ti panagtalon.
Maipalagip a nagturong dagiti opisyal ti rehion sadiay Malakañang ken kinniddawda kenni Presidente Duterte a masertipikaran ti maisaksakad nga otonomiya iti Cordillera kas maysa nga urgent bill kagiddan ti Bangsamoro Basic Law ti Mindanao.
