BAGUIO CITY – Pimusay ti maysa a lalaki bayat a nadangran ti kaduana kalpasan a natnag iti rangkis ti nagluganan dagitoy a mini dump truck sadiay Sitio Cadamayan, Balatoc, Pasil, Kalinga idi kalman.
Nabigbig ti pimmusay a ni Eddie Sawil , 60-anyos, naasawaan, agtagikua iti nasao a truck ken ni Eric Wanawan, 30-anyos, naasawaan ken driver ti nasao a lugan nga agpada a residente ti Balatoc, Pasil.
Maibasar iti report, pasang-at iti kalsada ken paturong sadiay Balatok ti nasao a trak a naglaon ti aggregates idi naaddaan iti parikut ti preno ken tie-rod ti lugan.
Gapu iti daytoy, napukaw ti driver ti kontrolna iti lugan agingga a natnagda iti rangkis nga addaan kauneg a mapattapatta a 50 a metro.
Nangitunda daytoy iti dagus nga ipupusay ni Sawil ken iti panagsagrap ni Wanawan iti nakaro a dunor.
Naiturong ti nadangran a driver iti Kalinga Provincial Hospital bayat a naiturong iti maysa a punerarya ti bangkay ni Sawil.
