BAGUIO CITY — Adda ti back-up plan wenno nakasagana a plano ti lokal a gobyerno ti Baguio iti kanito a saan a malpas wenno no maaddaan iti parikut ti staging area ti siudad iti paset ti Dairy Farm sadiay Marcos Highway.
Iti baet nga impanamnama daytoy ni Mayor Mauricio Domogan, nagkedked met a mangiwaragawag iti nasao a plano.
Kinunana nga ita a bulan ti Pebrero ket manamnama a madoble ti kaadu dagiti makolektar a basura iti sidudad ti Baguio isut gapuna a manarimaan ti patrabaho sadiay Dairy Farm.
Maipalagip a dumanon iti P7 million ti nailatang para iti panakaisimpa ti nasao nga staging area tapnu saan a makaistorbo kadagiti umili ti Tuba ken saan nga eyesore kadagiti motorista a lumablabas sadiay.
Impalawag pay ti mayor a dakkel ti tulong ti transfer area tapnu napartak a maiyakar dagiti basura paturong iti engineered sanitary landfill sadiay Urdaneta City, Pangasinan.
Nadakamatna a ti maysa a truck ti garbage hauler ket makalaon iti kapasidad ti uppat a garbage truck ti lokal a gobyerno.
