BAGUIO CITY–maad-adal ita iti Sangguniang Bayan ti La Trinidad, Benguet ti panaka-amyendar ti agdama a Liquor Ordinance ti munisipyo.
Sigun kenni PCI Benson Macli-ing, hepe ti La Trinidad PNP, maysa kadagiti maad-adal a mainayon iti Municipal Ordinance No. 06 series of 2013 ket ti panakaipawil ti panagparada dagiti kostumer ti maysa a bar iti igid ti kalsada no awanan ti pasdek iti bukod a parking area.
Kinunana a karaman met laeng a maad-adal ti panagala dagiti maseknan a balay paginuman iti parking attendant a mangasistar kadagiti lugan ken mangipasigurado nga awan ti nakaparada iti igid ti kalsada.
Panggep pay ti lokal a konseho ti La Trinidad a no dumteng ti oras a curfew wenno panagrikep ti maysa a balay paginuman, pakairamanan dagiti bar and restaurants ket kasapulan nga awanen ti arak a nakadasar iti lamisaan.
Maad-adal metlaeng ti panakapabaro ti klasipikasyon dagiti balay paginuman sadiay La Trinidad.
Naituding a maipatungpal ti public hearing tapnu maamuan ti kapanunutan dagiti bar owners kalpasan a naangay ti konsultasyon idi kalman seknan iti nasao nga addang.
