BAGUIO CITY – Panggep ti City Tourism and Special Events Office a mangaramid iti database dagiti artists iti siudad kasaruno ti panakairaman ti Baguio kas maysa iti UNESCO Creative Cities Network.
Iti panakiyuman ti Bombo Radyo kenni City Tourism Officer Jose Maria Rivera, kinunana a kasapulan a maimbentaryo dagiti artists iti siudad tapnu maamuan no asino dagiti pudpudno a taga-Baguio a maibilang iti nasao nga industritya.
Innayonna a kalpasanna ket taripnongenda dagitoy para iti dayalogo ken mabigbig dagiti proyekto dagitoy.
Kinunana a babaen iti daytoy ket mairaman dagiti local artists no adda dagiti aktibidad iti siyudad ken saan laeng a dagiti sumagmamano a kakadua dagitoy.
Dinakamatna pay a nasken nga adda ti proyekto nga idauluan dagiti local artists iti siudad ken dagitoy ket suportaran ti lokal a gobyerno.
Impannakkelna a maysa ti opisinada kadagiti nangaramid iti aplikasyon ti Baguio para iti panakairaman daytoy iti UNESCO Creative Cities Network.
