BAGUIO CITY – Nakemmeg ti maysa a kameng ti komunista a New People’s Army sadiay Dugong, Lower Uma, Lubuagan, Kalinga idi kalman.
Nabigbig daytoy iti nagan a Sabas Balcanao alyas ‘Solo’, maysa a communist terrorist a kameng ti Abraham Bannawagan Command, Komiting Larangang Gerilya Baggas.
Nakemmeg ni Balcanao babaen iti panangrebbek ti nagtitipon a pwersa ti 50th Infantry Battalion ken 5th Infantry Division ti Philippine Army ken ti Lubuagan Municipal Police Station iti pagnanaedanna.
Ti operasyon kontra iti nasao a rebelde ket babaen iti bileg ti warrant of arrest kontra kenkuana nga impaulog ti RTC Branch 25 ti Tabuk, Kalinga gapu iti kaso daytoy nga attempted murder.
Naipaima met ti rebelde iti Kalinga PNP para iti panakaiprosesona ken umno a dukomentasyon.
Kabayatanna, impanamnama ti Northern Luzon Command ti Armed Forces of the Philippines nga ituloyda a suportaran dagiti law enforcement operations tapnu maparmek dagiti local terrorist groups kas iti NPA tapnu magun-od ti nakapia ken natalinaay nga aglawlaw a mangitunda iti panagdur-as iti amianan ken sentro a Luzon.
