BAGUIO CITY-Nasarakan ti bangkay ti maysa a gangannaet iti uneg ti pagdigdigusan dagitoy sadiay Hanhan, Malama, Conner, Apayao idi kalman.
Nabigbig daytoy a ni Arif Salem Khamis Al-Raisi, tubo ti Muscat, Oman ken live-in partner ti maysa a sigud nga OFW a ni Rowena Asco Bautista.
Maibasar iti report, imbaga ti anak ni Bautista a nabayag a nakarikep ti ridaw ti pagdigdigusan dagitoy ken atapenna a simrek sadiay ti live-in partner ti inana.
Gapu iti daytoy, nagsirip ni Bautista iti nasao a pagdigdigusan ken sadiay a nakitana ni Al-Raisi a nakaidda iti datar.
Dinadaelna ti ruangan ken sadiay a nasarakanda nga awanan puot ti gangannaet ken iti tulong dagiti kaarubada ket naitaray daytoy iti maysa a klinika sadiay Conner, Apayao ngem naideklara a dead on arrival.
Gaputa awan ti nakita ti doktor a sintomas ti physical injury wenno foul play ken saanna a madetermina ti rason iti ipupusay ti gangannaet, inturongda ti bangkay sadiay Cagayan Valley and Medical Center para iti otopsiya.
