BAGUIO CITY–Naalaan ti maysa a lolo iti P400,000 a cash iti panakabiktimana iti budol-budol gang sadiay La Trinidad, Benguet.
Ti biktima ket senior citizen a 73-anyos bayat a dagiti suspek ket dua a babbae ken maysa a lalaki a nagserbi a driver dagitoy.
Naamuan a rimuar ti senior citizen manipud iti pagtaenganda tapnu apanna kuma alaen ti passbook daytoy.
Nupay kasta, nasalawna ti maysa a babae a suspek iti paset ti Kilometer 5 ken sadiay a nagis-istoryada agingga a saan a napupuotan ti biktima ket naguyugoy daytoy nga agturongda iti pagtaenganna ken sadiay a ginuyugoy manen dagiti suspek tapnu apan ag-withdraw iti bangko.
Nagturong dagitoy iti bangko ken sadiay a nag-withdraw ti lakay iti P400,000 nga inala dagiti suspek ken sinukatanda iti nangisit a pouch nga addaan padlock.
Inlukat ti biktima ti nasao a pouch apaman a nagsisinada kadagiti suspek ken sadiay a naduktalananna a papel ken parapunas ti linaon ti pouch isut gapuna a dagus a nagkamang iti pulisya.
Manarimaan metten ti panakairepaso ti CCTV camera iti asideg ti bangko a nag-withdraw-an ti biktima para iti panakabigbig dagiti suspek.
