BAGUIO CITY — Nakemmeg ti tallo nga indibidual, pakairamanan ti dua a menor de edad gapu iti panang-pickpocket dagitoy iti maysa nga estudyante iti market encounter sadiay Lake Drive, Baguio City idi kanikadua.
Nabigbig dagiti suspek a da Lea Datol Dawagan, 19-anyos ken ti dua a menor de edad nga agtawen 15 ken 14, bin-ig dagitoy a residente ti Irisan, Baguio City.
Maibasar iti report, manarimaan ti anti-pickpocket operation dagiti pulis iti nasao a disso idi naranaanda ti panangsursurot dagiti suspek iti biktima a babae.
Nakita dagiti pulis ti panangilukat ti suspek a ni Dawagan iti bulsa ti back pack ti biktima ken iti dagus a panangkaut ti maysa iti wallet ti biktima bayat a nagserbi ti maysa pay kas linged dagitoy.
Dagus nga inasitgan dagiti pulis dagiti tallo ken sadiayda a kinemmeg dagitoy kalpasan a narekober iti ikotda ti wallet ti biktima.
Naipaima met dagiti dua a menor de edad iti ikot dagiti social workers.
