BAGUIO CITY – Panggep ti Department of Tourism (DOT) a pasayaaten ti National Homestay Program sadiay Kibungan, Benguet.
Iti panakiyuman ti Bombo Radyo kenni Kibungan Municipal Tourism Officer Charo Solimen, kinunana nga awan dagiti mabalin a pagdagusan dagiti turista no kayatda pay ti agpaut ken agpasyar iti nagduduma a tourist destination ti munisipyo.
Sigun kenkuana, gapu iti daytoy ket panggep ti DOT ken ti lokal a gobyerno ti Kibungan a pasayaaten dagiti homestay accommodations nangruna ta saan a kabaelan ti munisipyo a mangipasdek kadagiti dadakkel a pagturogan.
Innayonna nga addan dagiti inisyal a residente sadiay a nakasaritada para iti panakaipasidong dagitoy iti panagsanay seknan iti panangipaay iti homestay accommodations para kadagiti sangaili nga agturturong sadiay Kibungan.
Naamuan a ti laeng municipal guesthouse ti maididiayada kadagiti kayatna pay nga agtalinaed sadiay bayat a no adda dagiti nangitugot iti tent ket mabalin a maaramat ti municipal grounds ken ti ovel ti pagadalan sadiay.
