BAGUIO CITY – Nakemmeg ti maysa a lalaki gapu iti panagtakawna iti cellphone ti maysa nga estudyante iti deppaar ti Lower General Luna Street, siudad ti Baguio idi kanikadua.
Nabigbig daytoy a ni Jovert Doñasales Samson, 36-anyos, residente ti Upper P. Burgos, siudad ti Baguio bayat a ti biktimana ket ni Ira Rafael Fontanos, 17-anyos, estudyante ken residente ti Honeymoon Road, siudad ti Baguio.
Maibasar iti report, indulin ti biktima ti selponna nga aggatad ti P7,000 iti bulsa ti back pack daytoy ken bayat a magmagna ket nakangngeg iti natnag iti kalsada.
Imberipikarna ti nangngegna ken sadiay a nakitana ti selponna ken ti panangpidut kuma ti suspek iti daytoy.
Impagarup ti biktima a tagikua ti suspek ti nasao a selpon isut gapuna a saannan nga inkankano ken nagtuloy a nagna ngem idi kitaenna ti back pack-na, nakitana a nakalukat daytoy ken awanen ti cellphone daytoy.
Nagkamang daytoy iti pulisya ken iti follow-up investigation, nakemmeg ti suspek ken narekober manipud iti daytoy ti selpon ti biktima.
