BAGUIO CITY- Imimbestigaran pay laeng ti La Trinidad PNP ti napasamak a pammaltog a nangitunda iti ipupusay ti maysa a retirado a pulis iti sango ti waiting shed sadiay Gladiola Center, Betag, La Trinidad, Benguet idi kalman.
Nabigbig ti biktima a ni Legaspi Siano Likinio, agtawen iti 59, naasawaan ken residente ti Barangay Betag bayat a saan pay a nabigbig ti suspek.
Maibasar iti report, immuna nga inreport ni Mr. Denver Ayodoc, guwardya ti La Trinidad Municipal Hall ti nasao nga insidente kalpasan a naipakaammo kenkuana nga ada ti daradara a nakadasay iti nasao a lugar.
Dagus met a nagresponde dagiti pulis ngem saanda a nadanunan ni Mr. Likinio gaputa naiturong daytoy iti pagagasan ken ditoy a naideklara a dead on arrival.
Naamuan a nagsagrap daytoy iti tama ti paltog iti kanawan a paset ti tengged daytoy a rimwar pay iti kanigid a paset daytoy.
Nakaala met ti SOCO iti maysa a basyo ti bala iti lugar a napasamakan ti krimen.
Iti agdama ket manarimaan met ti panangsukimat dagiti pulis kadagiti establisyemento sadiay no ada ti CCTV Camera a naimuntar sadiay.
