BAGUIO CITY – Sumangsango ita iti nagtutuon a kaso ti maysa a taxi driver kalpasan a pinanggepna nga itarayan dagiti pulis a mangkemmeg kuma kenkuana kasaruno ti maatap a panakairamanna iti hit-and-run idi kanikadua.
Nabigbig daytoy a ni Jone Somera Mina, 54-anyos, driver ken residente iti Sanitary Camp, Baguio City.
Immuna iti daytoy, naammuan iti pulisya a nairaman iti kaso a hit and run ti taxi nga imanmaneho ni Somera nga addaan iti trade name nga ISRAEL AND JAY-R TAXI ken plaka nga ABI-1825 sadiay BGH compound idi Abril 16 iti agdama a tawen.
Sigun kenni PCI Oliver Panabang, dadaulo ti Traffic Enforcement Unit ti Baguio City PNP, nakaawat daytoy iti mensahe a nasaripatpatan ti taxi nga imanmaneho ti suspek sadiay M. Roxas Street.
Nagturong daytoy ken ti imbestigadorna iti nasao a lugar ket nasabatda ti nasao a taxi.
Ginandat ni PCI Panabang a pasardengen ti taxi ngem limmiklik daytoy ken nagturong sadiay Don Bosco Road a gistayna pay madungpar ti nasao nga opisyal.
Kinamat daytoy dagiti pulis agingga a na-corner daytoy iti maar-aramid a kalsada sadiay Bayan Park, Aurora Hill iti tulong ti maysa nga indibidual a nakamotorsiklo.
Naammuan pay a nagkedked daytoy a maki-kooperar kadagiti pulis agsipud ta dina kayat a bumaba iti taxi-na ken dina kayat nga ipaay ti driver’s license daytoy.
Nagtulnog laeng ti taxi driver idi dimteng dagiti dadduma pay a pulis.
Iti panagsukimat dagiti ototridad, naammuan nga awanan iti record ti nasao a taxi driver manipud iti LTO.
Gapu iti daytoy, sumangsango ti suspek iti kaso nga Disobedience to a Person in Authority, reckless driving, failure to carry/ show authorization to use improvised plate, invalid driver’s license in operating a public utility vehicle ken panangaramatna iti colorum a lugan.
Naduktalan pay nga agduduma ti plaka ken trade name ti ar-aramaten ti nasao a taxi driver isut gapuna nga ad-adalen dagiti pulis ti posilibiad a maipilaan ti kaso a carnapping ni Mina.
Maibasar iti record ti pulisya, nakemmeg ni Mina idi 2004 gapu iti kaso nga attempted rape ken robberry gapu iti panang-hold up-na kadagiti pasaherona.
