BAGUIO CITY – Nakemmeg ti maysa a mannalon gapu iti panangtagtagbatna iti padana a mannalon sadiay Macutay, Rizal, Kalinga idi kalman.
Nabigbig daytoy a ni Samuel Esteban, 41-anyos, naasawaan ken residente ti Barangay Macutay bayat a nabigbig ti biktimana a ni Bernardo Lorenzo, 24-anyos, naasawaan ken residente metlaeng iti nasao a barangay.
Maibasar iti report, naaddaan ti suspek ken ti kadua ti biktima iti nabara nga argumento agingga a nagresulta iti panagdinnanog dagitoy.
Nupay kasta, naanawa ti biktima dagitoy.
Kalpasanna, nagawid ti suspek ken napanna inala ti buneng daytoy nga inaramatna a nangraut iti biktima ken iti kadua daytoy.
Natamaan ti kanawan a takiag ti bikitima ken intaray daytoy dagiti kakabagianna bayat a naipaima iti pulisya ti suspek.
