BAGUIO CITY – Dinayaw ni Agriculture Secretary Emmanuel Piñol ti siento porsiento a kooperasyon ken partisipasyon dagiti mannalon iti rehiyon Cordillera iti implementasyon ti Production Loan Easy Access.
Immuna iti daytoy, nagserbi ti rehion kas pilot area ti P46 million a pondo a naipautang kadagiti mannalon idi napalabas a tawen.
Inaramat dagiti mannalon iti sidong ti Benguet AgriPinoy Trading Center (BAPTC) ti inutang dagitoy iti pananggatangda kadagiti baro nga equipment, farm implements ken supplies.
Impannakkel met ni BAPTC chief of operations Violeta Salda a 291 a mannalon ti nagnumar iti pautang ti Department of Agriculture a nagresulta iti panakasustinir ti 67.55 nga ektarya ti pagmulaan.
Gapu iti daytoy, impeksa ni Secretary Piñol ti panakailatang ti kanayonan a P50 million a pondo tapnu adda ti utangen manen dagiti mannalon iti rehiyon tapnu manayonan dagiti agnumar iti daytoy.
Sagudayen ti Production Loan Easy Access ti Department of Agriculture a no ag-utang ti mannalon ket agbayad daytoy iti dua a porsiento nga interes iti makatawen ken mabalin nga agbayad daytoy iti uneg ti walo a tawen.
