BAGUIO CITY – Pimmusay ti maysa a babae bayat a nadangran ti uppat nga indibidual iti panaka-aksidente ti dua a motorsiklo iti deppaar ti Lower Tomay, Tawang, La Trinidad, Benguet idi kalman.
Nabigbig ti pimmusay a ni Mary Jane Moresto Gonzales, 30-anyos, naasawaan ken residente ti Puguis, La Trinidad, Benguet.
Maibasar iti report, nagtaud ti dua a motorsiklo manipud iti direksion ti Tomay, La Trinidad ken paturongda iti direksion ti abagatan ken idi pasalogda iti kalsada ket killaat a nagpakanigid ti motorsiklo nga imanmaneho ni Godfrey Quela, 37-anyos, baro, laborer ken residente ti Camp Dangwa, Alapang, La Trinidad.
Gapu iti daytoy, nadungparna ti motorsiklo nga imanmaneho met ni Arnold Sumahey, 35-anyos, naasawaan, laborer ken residnte ti Kaponga, Acop, Tublay, Benguet.
Nangitunda daytoy iti panagpakanigid ti dua a motorsiklo agingga a naidungparda iti saan a nasemento a kalsada.
Naitaray iti pagagasan dagiti dua a driver ti motorsiklo pakairamanan dagiti back rides dagitoy a da Gonzales; Erickson Plan, 33-anyos ken ni Jorison Sumahey, 28-anyos.
Nupay kasta, naideklara a dead on arrival ni Gonzales bayat a naduktalan a dagiti biktima ket nakainom iti arak idi napasamak ti aksidente.
Naiturong met iti La Trinidad PNP ni Sumahey bayat a na-admit iti pagagasan ni Quela.
