BAGUIO CITY – Saan a bigbigbigen ti lokal a gobyerno ti Benguet ti grupo a Cordillera Peoples Liberation Army (CPLA).
Nailanad daytoy iti resolusyon nga impasa ti Sangguniang Panlalawigan ti Benguet.
Sigun iti awtor ti resolusyon a ni Board Member Florencio Bentrez, saan a bigbigbigen ti probinsia dagiti dadduma pay nga armado a grupo malaksid laeng iti armada pwersa ti Pilipinas.
Kinunana a ti resolusyon ket panangsuporta ti probinsia iti resolusyon ti Regional Law Enforcement Coordinating Committee a mangguyguyugoy kadagiti local government units iti panangiwarasda iti impormasyon seknan iti kaawan ken saan a panakabigbig ti CPLA ken asinoman nga agibagbaga a miembro ti nasao nga organisasyon.
Nailanad pay iti resolusyon nga awan ti legal a basaran iti agtultuloy a kaadda ken presensia ti CPLA iti probinsia ti Benguet ken amin nga aktibidad dagiti agpampammarang a kameng ti nasao a grupo ket maikaniwas iti linteg.
Immuna iti daytoy, indeklaran ni Governor Crescencio Pacalso nga awan ti CPLA iti probinsia kagiddan ti apelana iti panangisardeng ti grupo iti panag-ayabda iti kakaduada manipud kadagiti umili ti Benguet.
Maipalagip a ti CPLA a maysa a militante nga organisasyon ditoy rehion a binuangay ni Fr. Conrado Balweg idi 1898 ket nabayagen a nasina ken nainayon iti armada ti pagilian.
