BAGUIO CITY – Maipasidong iti mandatory training dagiti 327 a nabotosan nga SK chairman ken kagawad iti nagduduma a barangay ditoy siudad ti Baguio.
Iti panakiyuman ti Bombo Radyo kenni Department of the Interior and Local Government – Baguio City Director Evelyn Trinidad, kinunana a maangay ti nasao a panagsanay inton May 22-24 gaputa magudua iti tallo a batch dagiti Sk officials.
Inlawlawagna a kasapulan a maipasidong iti mandatory training dagiti nabotosan nga agtutubo tapnu mapalubosan met ti panagtugaw dagitoy iti takem.
Innayonna nga inton May 28 ket ipasidongda met iti panagsanay para iti parliamentary procedure dagiti nabotosan nga SK Chairman.
Kinunana a daytoy ket gaputa mismo a dagiti SK Chairman ti mangipatungpal iti proseso ti panagpilida iti agserbi a panakabagi dagitoy iti Sangguniang Panlungsod wenno ti Sangguniang Federation president inton May 29.
Dinakamat pay ni Trinidad nga agkamkamakam ita ti opisinada gaputa iti pagalagadan ket nasken a malpas amin ti aktibidad ti SK inton May 29 wenno nasken nga iti nasao nga aldaw ket addan ti nabigbig a maipatugaw kas presidente ti SK Federation ti siudad.
