BAGUIO CITY – Agserbi a panakabagi ti Pilipinas iti maangay nga 8th ASEAN International Quiz Bee Competition sadiay Bali, Indonesia ti maysa nga incoming Grade 11 student manipud ditoy siudad ti Baguio.
Idauluan ni Jericho Villarico ti delegasyon ti pagilian iti nasao a kompetisyon a maangay inton Nobyembre.
Kasaruno daytoy ti panagbalin nga overall champion ti 16-anyos manipud Baguio City High School iti 8th National ASEAN Quiz a naangay sadiay Manila a pinasetan ti amin a rehion iti pagilian.
Makadua ni Villarico da Wynkqui Anne Cruz ti Rizal High School-Pasig a second placer ti kompetisyon ken Kim Eric Delicano ti Davao del Sur School of Fisheries a third placer.
Sigun kenni Villarico, maysa nga overwhelming task ti agserbi a panakabagi ti Cordillera ken ti Pilipinas iti maysa nga international event isut gapuna a pagsaganaanna a laing ti masungad a kompetisyon sadiay Indonesia.
