BAGUIO CITY – Kasarita ni Mayor Mauricio Domogan ti City Legal Office seknan iti isyu ti agtultuloy a panagngato ti presyo dagiti produkto a petrolyo ditoy siudad ti Baguio.
Intunda daytoy ti panaka-alarmana gapu iti agtultuloy a panagngina dagiti produkto a petrolyo ditoy siudad no idilig iti dadduma a lugar.
Sigun kenkuana, kasapulan a maipataw ti pannusa kadagiti gasolinaan ditoy lokalidad a mangar-aramid iti nasao a banag babaen iti panakaipila ti kaso kontra kadagitoy.
Kagiddan iti daytoy, impeksana ti pakaseknanna iti panakapaay ti Department of Energy a mangipalawag iti rason iti agtultuloy a panagngina dagiti produkto a petrolyo ditoy lokalidad.
Impettengna manen ti pagkasapulan para iti umno a panakailawlawag no kasano a ma-compute ti gatad ti petrolyo iti lokalidad nangruna ta dakkel unay ti nagdumaan ti presyo ti petrolyo ditoy siudad no idilig iti dadduma a lugar.
Kiniddaw pay ni Mayor Domogan ti panag-aksion met ti Department of Trade and Industry – Cordillera iti nasao a pakaseknan.
