BAGUIO CITY – Pimmusay ti maysa a barito kalpasan a kinettelna ti bukodna a biag iti maysa a green house sadiay Shilan, La Trinidad, Benguet.
Ti nasao a barito ket agtawen iti dise-otso, awanan asawa, mannalon ken residente iti nasao a lugar.
Sigun iti ama ti nasao a barito, naudi a nakitana ti anakna idi rabii ti Sabado idi agkidkiddaw iti sangaribo a pisos, nupay impaayanna laeng daytoy iti tallo gasut a pisos.
Kinunana a manipud iti nasao nga aldaw ket saanen a nagaw-awid ti biktima agingga a natagtagainep ti ikitna nga aglemlemmeng ti nasao a barito iti green house iti ngato ti pagtaengan dagitoy.
Gapu iti daytoy, nagturong ti nasao nga ikit ti barito iti green house idi kalman ti agsapa ken sadiay a nakitana ti bagi ti barito a nakasabit iti uneg ti green house babaen iti nylon cord.
Improseso met ti PNP-SOCO ti nasao a disso ken awan ti nakita a pagilasinan ti foul play a rason tapnu saanen nga ipasidong ti pamilya ti bangkay iti otopsiya.
Malamlamayan ita ti bangkay ti barito iti pagtaengan dagitoy.
