BAGUIO CITY – Agtalek ti COMELEC-Baguio a dakkel ti kapasidad dagiti nabotosan nga opisyales ti Sangguniang Kabataan (SK) a mangbukbukel ita iti SK Federation ditoy siudad ti Baguio.
Impeksa daytoy ni City Election Officer Atty. John Paul Martin kasaruno ti panakabotos ni South Central Aurora Hill SK Chairman Levy Lloyd Orcales kas presidente ti SK Federation-Baguio.
Sigun kenkuana, nakitada ti napintas a leadership skills dagiti amin nga SK Officials nangruna dagiti nangabak nga opisial ti federasyon a mainayon iti lokal a konseho ti siudad.
Kinunana a napintas met laeng ti background dagiti kaaduan nga SK official gapu kadagiti kapadasan dagitoy kadagiti nakitiptiponanda nga organisasyon.
Naamuan pay a nagserbi a Panel of Observers ti DILG-Baguio City, Baguio City Police Office, ti akademya ken sumagmamano a non-government organizations iti panagbobotos dagiti SK chairmans ti siudad para iti agtugaw a presidente ti federasyon dagitoy.
