BAGUIO CITY- Sinuspindir ti Office of the Ombudsman ti maysa a municipal councilor nga outgoing president ti Association of Barangay Councils (ABC) ti Sabangan, Mt. Province gapu iti panakapaayna a mangisumitir iti Statement of Assets and Liabilities and Networth (SALN) iti uneg ti sumagmamano a tawen.
Nailanad iti lima a panid a desisyon nga insurat ni Graft Investigation and Prosecution Officer III Maria Viviane Cacho-Calicdan a masuspindir iti las-ud ti tallo a bulan nga awanan iti bayad ni Sabangan Municipal Councilor ken ABC president Roger Dangsi.
Nagramot ti desisyon iti kaso a grave misconduct nga impila da Melchor Bao-idang Jr. ken Richard Budod kontra iti konsehal ngem linukayan ti Ombudsman ti nasao a kaso ken napagbalin a ‘simple neglect of duty’
Imbilin pay ti Ombudsman ti dagus a panangimplementar ti Interior and Local Government Secretary iti nasao a pammilin apaman a maawtda ti kopya.
Maibasar iti reklamo kontra kenni Dangsi a naipila iti Ombudsman idi June 2017, maatap a napaay ti konsehal a nangipila iti SALN daytoy idi 2005 agingga 2009 ken idi 2013 a sinertipikaran ti records officer ti Ombudsman.
Nupay kasta, pinaglibakan ni Dangsi ti alegasyon kontra kenkuana ken kinunana nga impilana ti SALN daytoy kadagiti nadakamat a tawen ken kinunana nga impilana dagitoy iti opisina ti Liga ng mga Barangay ti Sabangan.
Naibasura ti kaso a grave misconduct kontra kenni Dangsi gaputa nakita ti Ombudsman a saan nga ingagara ti opisyal a labsingen ti linteg ken awan maris daytoy iti korapsion.
