BAGUIO CITY – Umap-apela ti maysa nga ina iti Department of Social Welfare and Development (DSWD) – Cordillera tapnu maisubli ti cash grant ti 10-anyos nga special child daytoy iti Modified Conditional Cash Transfer (MCCT) Program ti ahensia.
Sigun kenni Evelyn Paulino manipud Lubas, La Trinidad, nairaman ti maikapito anakna kadagiti benipisaryo ti MCCT Program idi 2012 agingga 2013 ngem awan pay ti makatawen wenno agarup innem laeng a bulan a nag-awat daytoy ti cash grant ket naisardengen.
Kinunana a nagturong daytoy iti nasao nga opisina tapnu idanun ti pakaseknanna ngem nagpapasaan daytoy dagiti empleyado sadiay.
Imbingayna a tunggal pay-out dagitoy idi ket kanayon a makidkiddaw ti panangiparangna iti ebidensia a ti benipisaryo ket pudpudno nga anakna idinto ta kompleto dagiti dokumento nga insumitirda idi nagaplikarda pay iti nasao a tulong-pinansial.
Dinakamatna nga inkalikagum pay ti agit-ited iti pay-out nga itugotna ti maseknan nga anakna ngem impettengna met a saanna a kabaelan nga itugot ti anakna gaputa adayo ti balayda iti kalsada, nadagsen ti anakna ken saanna a kabaelan nga ubbaen ti anakna gaputa addaan met daytoy iti sakit iti puso.
Kinunana a killaat lattan a naputed ti panakaipaay ti cash grant iti anakna a P800 tunggal bulan.
Gapu iti daytoy, iyap-apelana iti DSWD a no mabalin ket maisubli ti tulong pinansial iti nasao nga anakna gaputa dakkel daytoy a tulong nangruna ta bassit ti mategteggedan ti asawa daytoy.
