BAGUIO CITY – Naiturong iti pagagasan ti 37 nga estudyante sadiay Natubleng, Buguias, Benguet kalpasan a nasabidunganda iti impaunegna a kendi nga inwaras ti agasawa a Koreano idi kalman.
Naamuan a 19 kadagitoy ti estudyante iti Natubleng Elementary School bayt a ti 18 ket estudyante iti sekondarya.
Sigun kenni PSI Dexter Simon, hepe ti Buguias PNP, uppat pay laeng nga ubbing ti agtaltalinaed iti pagagasan gapu iti food poisoning.
Dagus met a nasurutan dagiti pulis ti agasawa a nangiwaras kadagiti kendi a nabigbig a da da Lee In Suk, 52-anyos ken Tiehua Woom, 55-anyos, residente iti Bangao, Buguias, Benguet ken nagpabigbig dagitoy a misyonaryo.
Kinunana ni PSI Simon a nangiwaras dagiti agasawa iti kendi a natatakan ti ‘strawberry curls’ kadagiti estudyante iti ruar ti pagadalan.
Nupay kasta, kalpasan ti sumagmamano a minutos ket killat a nagsakit ti tiyan dagiti ubbing ken nagbakbakwar pay dagitoy isut gapuna a dagus a naitaray dagitoy iti Atok District Hospital.
Innayonna a posible a makasuan ti nagtaudan ti makasabidong a kendi nga inwaras dagiti agasawa a Koreano iti kanito a mapaneknekan a “poisonous” dagitoy.
Naamuan a ginatang laeng dagiti agasawa a Koreano dagiti kendi iti maysa a groserya sadiay met laeng Buguias ken inwarasda laeng kadagiti ubbing.
Kinumpiskar met dagiti pulis dagiti nabatbati a kendi tapnu maipasidong iti laboratory test.
Nagpirma iti affidavit ti agasawa a Koreano a makitinnulongda iti panakasukimat ti nagtaudan ti inwaras dagitoy a kendi.
