BAGUIO CITY – Ad-adalen ita ti national ken regional office ti Department of Environment and Natural Resources (DENR) dagiti schemes nga ipatungpalda tapno marisut ti isyu ti polusyon ken nailet a trapiko iti siudad ti Baguio.
Impaka-ammo daytoy ni DENR Undersecretary for Field Operations Atty. Juan Miguel Cuna iti panagbitlana iti manarimaan a 2018 Cordillera Environmental Summit a maang-angay ditoy siudad ti Baguio.
Kinunana a maysa kadagiti kangrunaan nga isyu iti siudad a rumbeng a maipaayan iti solusyon ket ti narugit nga angin gapu iti kaadu dagiti lugan a dumaldalyasat iti nagduduma a paset ti kalsada.
Nnamnamaenna nga iti kabiitan a panawen ket adda ti mabukelda nga scheme tapno matulungan dagiti opisyal ti siudad ken maliklikan ti pannakaipada ti City of Pines iti dadduma a lugar kas iti Boracay.
Maipalagip nga inwaragawag idi ni sigud a Tourism Secretary Wanda Teo a maysa kadagiti panggep ti ahensia a maipasidong iti rehabilitasyon ket ti Summer Capital of the Philippines.
