BAGUIO CITY – Pakabuklan a 42 nga estudyante ti elementarya ken sekondarya sadiay Natubleng, Buguias, Benguet ti naitaray iti pagagasan kalpasan a nasabidongan dagitoy iti kinnanda a kendi idi kalman kas maibasar iti listaan ti Atok District Hospital.
Sigun kenni PSI Dexter Simon, hepe ti Buguias PNP, idi laeng agsapa ket 11 nga estudyante ti naisubli iti nasao a pagagasan kalpasan a simmakit manen ti tiyan dagitoy bayat nga adda ti innem nga immunan a na-confine iti nasao a pagagasan.
Sigun met kenni Dr. Gil Pacetes, attending physician dagiti nasao nga estudyante, adda ti naidumduma nga angot a nasay-op dagiti ubbing idi linukatanda ti naawatda nga kendi nga addaan ti strawberry flavor.
Nupay rimsua ti adu nga alegasyon kontra iti agasawa a Koreano a nangiwaras kadagiti nasao a kendi, kinuna ni PSI Simon a napimpintas latta no maidanun dagiti nasao nga alegasyon iti istasyon dagitoy.
Dinakamatna a nabayagen nga agiwarwaras iti taraon ti agasawa a nagpabigbig a misyonaryo ngem ita laeng a napasamak ti nasao nga insidente.
Innayonna a posible a makasuan ti manufacturer ti kendi ken ti agtagikua iti groserya sadiay Buguias, Benguet a gimmatangan ti agasawa a da Lee In Suk ken Tiehua Woom iti nasao a kendi nga addaan tatak nga ‘strawberry curls’.
Naamuan a nagpirma ti agasawa iti affidavit a nakailanadan ti panakitinnulongda iti imbestigasyon tapnu maamuan ti nagtaudan dagiti ginatang ken inwarasda a kendi a nangitunda iti panakasabidong dagiti nasao nga estudyante.
