BAGUIO CITY – Manamnama nga ad-adda nga agkaykaysa dagiti amin a drivers ken operators dagiti parapasahero a jeep ditoy siudad ti Baguio ken probinsia ti Benguet kalpasan a nabukel ti federasyon dagitoy.
Sigun kenni Rey Bacoco, presidente ti maysa a grupo dagiti jeepney drivers and operators iti siudad, naawagan ti nasao a federasyon iti United Metro Baguio-Benguet Jeepney Operators and Drivers’ Federation.
Kinunana a binukelda ti federasyon gaputa adun dagiti nabukel a jeepney groups a mangituntunda tapnu marigatanda a mangipamaymaysa iti addang a nasken nga isayangkat dagitoy.
Nabotosan ni Bacoco kas presidente ti federasyon bayat a nabotosan ni Pat Evangelista kas bise presidente.
Innayon ni Bacoco a ti addang ket panagsaganada iti implementasyon ti jeepney modernization program.
Namnamaenda nga agkaykaysa amin a kapanunutan dagiti drivers ken operators dagiti jeep mainaig kadagiti isaksakadda kas iti panakaipanagto ti plete kadagiti jeep.
Dinakamatna pay a babaen iti kabaruan a federasyonda ket makabukelda iti plano a pangtitinnulongan dagiti miembro daytoy.
