BAGUIO CITY – Agtultuloy ti nainget a panangbantay ti City Health Services Office kadagiti lugar iti siudad ti Baguio a nakailistaan dagiti nangato a kaso ti dengue.
Iti panakiyuman ti Bombo Radyo kenni City Health Officer Dr. Rowena Galpo, kinunana a bambantayanda ita ti dengue nangruna ta panawen manen nga umado ti kaso ti nasa sakit.
Kinunana nga iti record ti opisinada ket ngimmato iti 43 percent ti kaadu ti dengue iti siudad iti maikadua a kwarter ita a tawen no idilig iti maikadua a kwarter ti napalabas a tawen.
Dinakamatna a dagiti bambantayanda ket ti pakabuklan ti Loacan, Atok Trail, Apugan, Camp 7, Camp 8 ken San Vicente ken dagitoy ket siguden a naipaspasidong iti panagbantayda kadagiti napalpalabas a tawen.
Innayonna a numero uno a breeding sites dagiti malok kadagiti nasao a babbarangay ket dagiti daan wenno nadadael a pilid.
Sigun kenni Dr. Galpo, idi pay a naobserbaranda nga adu dagiti pagtaengan kadagiti nasao a lugar a mangikabkabil iti daan a pilid iti bubong ti babbalayda ken dagitoy met ti agserserbi a pagpapaaduan dagiti lamok.
Kinunana pay a maikadua a nakitada ket dagiti drum a saan a makalkaluban ken saan a madaldalusan.
Dengue breeding sites
Ad-adalen ita ti City Health Services Office no anya ti aramidenda kadagiti daan a pilid tapnu maikkat dagitoy ken saan nga agserbi a breeding sites dagiti lamok.
Kinuna ni Dr. Galpo nga adda dagiti nakitana a kagawaan a naaramid manipud iti rubber wenno pilid a napinturan.
Innayonna a mabalin met a maaramat dagitoy a kabiti wenno pagmulaan kadagiti sabong a mairaman iti disenyo ti maysa a lugar.
Dinakamatna pay ti posibilidad nga adda ti mangidaulo iti programa a tunggal maysa a nadadael a pilid ket masukatan ti maysa a kilo ti bagas a kas sadiay La Union.
Impetteng ni Dr. Galpo a nasken a pagtitinnulongan ti panangdadael kadagiti lugar a pagpapaaduan dagiti lamok tapnu awanen kadagiti umili ti mabiktima kadagiti sakit a iyak-akar dagiti lamok kas iti dengue.
Inyunay-unayna manen a no awan ti lamok ket awan ti dengue isut gapuna a nasken a makikaykaysa ti amin iti panakagun-od ti nasao a banag.
